മരണാനന്തരം....?

നിലവിളിക്കയാണെന്റെയമ്മ

മരവിച്ചിരിക്കയാണെന്റെ പാതി

അണപൊട്ടിയൊഴുകാനെന്നപോലെ 

ഉമ്മറത്തിണ്ണയിലച്ഛൻ

ഏങ്ങിക്കരയുമെൻപെങ്ങൾതൻ-

മടിയിലായ്‌തലചായ്ച്ചിരുകൺമണികൾ

ദുഖാഗ്നിപർവ്വതനിരകളും പേറി 

ചിതയൊരുക്കുന്നു മിത്രങ്ങൾ

-ഒരു വർഷത്തിന് ശേഷം-

ബലിദാനദിനയാത്രയാണിന്നുനാട്ടിൽ

കാൽപ്പന്തുമാമാങ്കമാണെന്റെപേരിൽ

കത്തുന്നതൂക്കുവിളക്കിന്റെ താഴെ

നാമജപം നടത്തുന്നെന്റെ മക്കൾ

ആ കുഞ്ഞുഹൃദയങ്ങൾക്കച്ഛനുമമ്മയും

സിന്ദൂരമണിയാത്തൊരെൻസഖിയല്ലയോ

കൊടിപിടിച്ചെന്നൊരാകുറ്റവുംചെയ്തുഞാ-

നെൻകൈപിടിച്ചെന്നകുറ്റമവൾചെയ്തു

നാടിനെസേവിച്ചു മതിവന്നതില്ലെയെൻ

വീടിനെസ്‌നേഹിച്ചു കൊതിയണഞ്ഞില്ല

മോഹഭംഗക്കഠാരപ്പിടികളാൽ

മോഹമലരരിഞ്ഞെടുത്തില്ലേ

കാലന്റെയുദ്യമം കാലക്രമേണയാ-

യിരുകാലിക്കൂട്ടങ്ങളേറ്റെടുത്തീടവേ

പത്തുമാസംനൊന്തുപെറ്റവയറിന്നു

പകരംകൊടുക്കുവാനെന്തുണ്ടു കാലമേ?